GENSAN- Gibutyag ni Engr. Ronald Nuñeza sa City Engineer’s Office sa General Santos City nga aduna nay mga proyekto sa drainage nga giapil sa mga road construction aron mas mapalambo ang pasilidad.
Matod ni Nuñeza, daghan gihapon og lugar sa Gensan nga wala pay drainage system tungod kay walay paadtuan sa tubig, nga usa ka dakong kabalaka dili lang sa syudad apan bisan sa ubang bahin sa nasud.
Gihangyo usab niya ang katawhan nga kung adunay mga reklamo o concern bahin sa drainage sama sa pagbara, pagkaguba, o ubang problema, ipahibalo dayon sa ilang buhatan aron matagad ug maaksyunan.
Apan kon ang problema kay major drainage project, mas molungtad ang proseso tungod kay kinahanglang sundon ang tanang legal ug teknikal nga lakang.
Sa iyang pamahayag, giila ni Nuñeza nga “swerte ang Gensan” kay bisan kung masinatian ang pagbaha, dali ra usab kini mahubas dili sama sa nahitabo sa ubang lugar sama didto sa Kauluhan.
