GENERAL SANTOS CITY – Gihatagan ni City Councilor Franklin Gacal Jr. si City PNP Director Senior Supt. Raul Supiter ug 24 oras, aron undangon sa hingpit ang operasyon sa mga tolendoy dinhi sa siyudad.
Dungan kini sa pag-courtesy call ni Supiter sa GenSan City Council kagahapong adlawa atul sa sesyon.
Matud ni Kag. Gacal, usa sa mga nag-unang kinahahanglang tutukan nga problema dinhi sa siyudad hilabi na kaniadtong panahon ni kanhing City PNP Director Ruel Berango mao ang kalabot sa mga tolendoy ug video karera.
Kini gumikan ang mga kabataan matud pa ang maoy labing naapektuhan tungod nahurot na ang ilang balon gumikan sa pagkagumon sa tolendoy ug slot machines.
Ug gani, gibasa pa ni Gacal alang kang Supiter ang pangalan sa pipila ka mga gialegahan nga nagpaluyo sa operasyon sa mga tolendoy sa siyudad, kung asa may usa matud pa ka pulis. Ug gani, usa matud pa sa mga nahisgutan ang miadto mismo sa iyang panimalay aron mananghid nga mag-operate dinhi sa siyudad.
Gatuo matud pa si Kag. Gacal nga makaya kining himuon sa bag-ong city PNP director, ug gipasalig nga makaangkon sila ug maayong pagsinabtanay, kon magmalampuson si Supiter nga mapahunong ang operasyon sa tolendoy sa siyudad.
