Magpabiling detinedo sa The Hague ang kanhing Pangulong Rodrigo Duterte samtang gihulat ang pagsugod sa iyang pagdunggog may kalabotan sa kasong crimes against humanity, sumala sa International Criminal Court.
Base sa desisyon sa International Criminal Court Trial Chamber III, dili igo ang mga argumentong gisumite sa depensa kalabot sa kahimtang sa panglawas ni Duterte aron mausab ang naunang findings sa court-appointed medical experts.
Giingon sa korte nga walay bag-ong ebidensya o dakong kausaban sa kahimtang sa panglawas sa kanhing pangulo nga mahimong basihan aron siya temporaryong buhian.
Gikonsiderar usab sa ICC ang pagdumili ni Duterte sa pag-ila sa hurisdiksyon sa korte, nga sumala niini nagpakita nga posible siyang dili motuman sa mga mando sa korte kon siya buhian.
Dugang pa sa ICC, adunay “real and substantial risk” nga posible siyang mokalagiw o makababag sa proseso sa hustisya tungod sa iyang impluwensya ug koneksyon.
May kalabotan niini, gitugotan sa korte ang depensa nga dili una motambong si Duterte sa unang status conference nga gitakda sa Mayo 27, basta magsumite lamang og pormal nga hangyo.
Ang maong hearing maghisgot sa iskedyul sa pagdunggog, mga ebidensya, ug uban pang preparasyon alang sa kaso.
Una nang gikumpirma sa ICC Pre-Trial Chamber I ang mga kaso batok kang Duterte may kalabotan sa giingong mga pagpamatay atol sa iyang kampanya kontra droga sa dihang mayor pa siya sa Davao City ug sa ulahi isip Presidente sa Pilipinas.
