GENERAL SANTOS CITY – Luyo sa bahad COVID 19 pandemic sa kasamtangan apan ubay-ubay gihapon ang gapalit og mga bulak aron ihatag sa ilang mahal sa kinabuhi.
Kini ang gibutyag ni Susan Abong, ang Presidente sa GenSan Flower-Vendors Association.
Sa obserbasyon niini nga bisan nakasinati og kapigaduhon ang mga tawo karon tungod sa virus apan dili kini makapugong aron ipadangat ang gugma sa usa ka tawo pinaagi sa paghatag og bulak.
Giangkon sa nasampit nga ang mga online sellers sa bulak og uban pang gimik sa Valentines Day ang pinaka-kusog nilang kompetensya sa pagbaligya og mga bulak hinungdan nga matag miyembro sa ilang asosasyon ang mag-iyahay na lang usab og diskarte aron mahalinan.
Sa iyang pamahayag, hinay ang halin nila sa mga bulak sa matag adlaw’ng Dominggo bisan kaniadto pa hinungdan nga mas naguol karong Valentines Day , bisan gamay lang ang ilang halin sa tibuok adlaw.
Luyo sa pandemya, walay paglihok sa presyo sa mga bulak sa kasamtangan kung asa ang rose mapalit og P30 hangtod P200 depende kun local o imported; ang dozen sa short stem nga rose mapalit og P300 samtang ang long stem ang anaa sa P500-600 ang presyo; ang stargazer P500–600 ang matag usa; sunflower anaa sa 150-200 ang matag usa; ang dozen sa Astromerias anaa sa P200; ang Carnation ang mapalit og P300 pataas; ang dosena sa mums anaa sa P200- P300.
Nasayran nga ang bulto sa mga bulak nga ilang ginapalit gikan sa ilang supplier sa Davao, ang ginagmay lang ang gikan sa Manila, Bario Otso Marbel og Tupi.
