Usa ka makasaysayong pagbalik ang natigayon sa entablado sa America’s Got Talent (AGT) dihang subling misabak sa kumpetisyon ang Filipino-American singer nga si Jessica Sanchez makalabay ang duha ka dekada.
Gidawat niya ang Golden Buzzer gikan kang Sofía Vergara pagkahuman sa iyang makapatandog nga audition.
Mikanta si Sanchez sa “Beautiful Things” ni Benson Boone, nga nakadawat dayon og standing ovation gikan sa audience ug sa tanang judges nga silang Sofía Vergara, Simon Cowell, Mel B, ug Howie Mandel.
Matud pa ni Jessica nga dyes anyos pa lang siya sa dihang miapil siya sa Season 1 sa AGT, nga matud niya nakaabot sa semi-finals, dungan niini ang pagpa-ambit niya sa pagbiya og pagbalik sa musika.
Dugang pa niya nga siya minyo na og mabdos sa iyang unang anak.
Samtang, emosyonal si Sofía Vergara sa wala pa gipindot ang Golden Buzzer.
“It’s so amazing that we are celebrating the 20th anniversary, the 20th season of AGT. You are here again after 20 years, you are pregnant. You are so beautiful; you are so ready to do all this. This was a special moment, and I think that you deserve this,” ani Vergara.
Kahinumduman nga niadtong 2013, gipagawas niya ang iyang debut album nga “Me, You & the Music” ug migawas sa sikat nga musical TV series nga Glee.
