Nahimong false alarm ang kadudahang butang nga nakit-an sa East Side Central Public Market sa General Santos City pasado alas-12:30 sa kaadlawon human mapamatud-an nga dili kini eksplosibo.
Sumala sa report, usa ka market guard ang nakabantay sa duha ka tao nga hubo nga midagan sa maong lugar.
Sa iyang pagsusi sa palibot, nakita niini ang usa ka tubo nga giputos og cellophane, hinungdan nga iyang gilayon kining gipahibalo sa kapulisan tungod sa posibleng hulga sa seguridad.
Mitubag dayon ang mga personnel sa Police Station 6 ug gipatawag ang General Santos City Explosive Ordnance Disposal (EOD) Unit aron susihon ang maong butang ug masiguro ang kaluwasan sa lugar.
Isip preventive measure, gidisrupt sa EOD ang maong tubo aron malikayan ang posibleng peligro. Apan sa ilang dugang nga pagsusi, nasuta nga kabahin lamang kini sa tubo sa palengke nga gilubong sa maong lugar ug giputos lang og cellophane.
Bisan nahimong false alarm ang insidente, gidayeg sa kapulisan ang market guard tungod sa iyang pagkaalerto ug dali nga pagreport sa kadudahang butang, nga ilang giingong maoy hustong pamaagi aron mapanalipdan ang kaluwasan sa publiko.
