Gihatagan ug executive clemency ni Pang. Ferdinand Marcos Jr. si kanhi Iloilo City Mayor Jed Patrick Mabilog.
Kini ang gikumpirma ni Exec. Sec. Lucas Bersamin.
Giingong gihimo ang maong lakang isip kabahin sa mga inisyatibo sa administrasyong Marcos aron mahatagan og tiyansa nga subling makasugod ang mga indibidwal nga nakasinati og legal nga hagot o kaso sa nangaging panahon.
Parte na usab kini sa pagpatuman sa mandato sa Presidente ilawom sa balaod.
Nasayran nga ang desisyon ni Pangulong Marcos ang miagi sa makuting pagtuon ug gitan-aw ang rekomendasyon sa Board of Pardons and Parole.
Si Mabilog may giatubang nga kasong paglapas sa RA 3019 o Anti-graft and Corrupt Practices act og RA 6713 o Code of Conduct and Ethical Standards for Public Officials.
Kahinumdoman nga August 30, 2017 dihang mihawa si Mabilog sa Pilipinas human giakusahan ni kanhi Pangulong Rodrigo Duterte nga lakip kini sa listahan sa mga public officials nga matod pa nalambigit sa illegal drug trade og drug protector.
September 2024 usab kini mibalik sa nasud gikan sa US kung asa kini nagpailawom sa asylum.
Mitambong usab si Mabilog sa Quad Comm hearing niadtong September 2024 kung asa gipanghimakak niya pag-usab ang mga akusasyon kaniya sa kanhi administrasyon.
