Malampusong gibalhin na sa laing presuhan si kanhing Negros Oriental Representative Arnolfo ‘Arnie’ Teves Jr. human magpagawas og kamandoan ang usa ka korte sa Maynila.
Gikan siya sa Building 14 sa National Bureau of Investigation (NBI) detention facility sa Muntinlupa City, ug karon naa na siya sa presuhan sa Bureau of Jail Management and Penology (BJMP) compound sa Camp Bagong Diwa, Taguig City.
Gipahigayon ang maong pagbalhin human ang Manila Regional Trial Court Branch 51 magpagawas og commitment order nga nagmando sa NBI sa pagpatuman niini.
Tungod niini, misunod ang NBI sa mando sa korte ug gibiyahe dayon si Teves padulong sa Metro Manila District Jail, Annex 2 BJMP Compound sa Taguig.
Kahinumduman nga misumite og mosyon ang kampo ni Teves aron dili siya ibalhin sa lain nga presuhan, apan gibasura kini sa korte.
Busa nadayon gihapon ang pagbalhin, samtang nagapadayon pa ang mga kaso nga giatubang ni Teves, lakip na ang murder.
Ang korte nga nagpagawas sa maong kamandoan sa pagbalhin mao ang Manila RTC Branch 51, nga mao usab ang mihupot sa kaso nga may kalabotan sa pagpatay ni kanhi Negros Oriental Governor Roel Degamo.
