Nahagsa duol sa Sao Paulo sa Brazil ang usa ka sa regional turboprop nga eroplano nga nagdala sa 62 ka mga tawo ug gituhoang patay ang tanang sakay niini.
Sumala sa mga lokal nga opisyal duol sa crash site, ang eroplano nga hinimo sa ATR nagtuyok nga wala makontrol ug nahulog sa luyo sa kakahoyan duol sa mga balay ug gisundan ang panghitabo sa usa ka dako nga bul-og sa itom nga aso.
Sumala sa Airline Voepass ang eroplano nga milupad gikan sa Cascavel, Parana, paingon sa nag-unang international airport sa Sao Paulo, apan nahagsa sa lungsod sa Vinhedo, mga 80 km kon 50 ka milya sa amihanan-kasadpan sa Sao Paulo.
Ang eroplano gilista sa flight tracker nga FlightRadar24 isip usa ka ATR 72-500 turboprop.
Ang ATR hiniusang gipanag-iya sa Airbus ug Italian aerospace group nga Leonardo.
