GENSAN – Pormal nang natapos ang enrollment period alang sa School Year 2025–2026 sa tanang pampublikong eskwelahan sa siyudad sa General Santos, subay sa iskedyul nga gipagawas sa Department of Education (DepEd-GenSan).
Sa pamahayag ni Mervie Seblos, Assistant Schools Division Superintendent sa DepEd-GenSan, giingon nga hangtod lamang kagahapong adlawa Hunyo 13, 2025 ang ulahing adlaw sa enrollment sa mga magtutungha.
Bisan pa man niini, giklaro ni Seblos nga modawat gihapon sila og late enrollees apan gilauman nga makasugod og ulahi ang klase ang mga bata nga late na magpa-enroll.
Gipahibalo usab nga magsugod na ang klase karong Lunes, Hunyo 16, ug andam na ang kadaghanang mga tulunghaan sa pagpangdawat sa mga magtutungha, human sa sunod-sunod nga mga preparasyon, lakip na ang Brigada Eskwela ug Oplan Balik Eskwela.
Ang Oplan Balik Eskwela, nga naglakip sa pagpanghinlo ug pagpangandam sa mga pasilidad sa eskwelahan, ang magapadayon hangtod Hunyo 20, samtang gipasiguro sa mga school heads nga andam na ang mga classrooms, mga gamit sa pagtudlo, ug listahan sa mga estudyante.
Gipasalamatan sa DepEd-GenSan ang tanang ginikanan, magtutudlo, ug barangay volunteers nga naningkamot sa pagpangandam sa hapsay nga pagbukas sa klase.
