Gisaysay ni election lawyer Atty. Romulo Macalintal nga iyang ipaabot sa Korte Suprema ang isyu sa pag-usab sa iskedyul sa Barangay ug Sangguniang Kabataan Elections (BSKE) sa 2025 aron pormal nga makuwestyon kini.
Matod niya, posible nga adunay paglapas sa balaod ug sa katungod sa mga botante kung ipadayun ang pag-postpone sa eleksyon nga nakatakda na.
Gipunting sa abogado nga limitado ra ang termino sa mga opisyal sa barangay ug SK, ug dili kini angay dugangan pinaagi sa legislative action nga magpadayon sa ilang pagserbisyo labaw sa giingon sa balaod.
Iyang gipasabot nga ang pagka-delay sa eleksyon mahimong mosangpot sa pagkawala sa mandato gikan sa katawhan.
Gidugang pa ni Macalintal nga dili lang kini legal nga isyu, apan usa ka prinsipyo sa demokrasya nga nagkinahanglan nga respetohon ang tukmang iskedyul sa eleksyon aron mapadayon ang katungod sa katawhan sa pagpili og bag-ong lider sa barangay ug kabataan.
