Halos 200 ka pamilya ang naapektuhan sa pagbaha sa Esperanza, Sultan Kudarat. Kini ang gikumpirma ni Jorie Mae Balmediano, tigpamaba sa Office of the Civil Defense Region 12 sa pakighinabi sa Bombo Radyo Koronadal.
Sumala kang Balmediano, sa naasoy nga ihap pito ka pamilya ang nagpabilin sa evacuation center tungod wala nay kapauli-an nga balay human naanod sa pagbaha .
Matud ni Balmediano nga apektado usab ang Sitio Lifi-Lifian, Sitio Kuhanen ug Purok Everlasting sa Barangay Maliban tungod sa lapad nga pagbaha hinungdan sa pagkaanod sa mga pananum , binuhi nga kahayupan ug panginabuhi-an sa mga residente sa lugar.
Sa karon,nangita ang LGU ug lugar nga kabalhinan sa mga residente nga mas luwas sa mga pagbaha tungod sa delikadong sitwasyon kung subli nga makasinate ug makusog nga pagbaha.
Nasuta nga nanghatag ug ayuda ang LGU Esperanza ug provincial government sa Sultan Kudarat sa mga apektadong pamilya.
Lakip sa gipanghatag sa Provincial Disaster Risk Reduction and Management Officer ang mga banig, habol, unlan, mosquito net, limpyu nga tubig mainum ug pagkaon.
Samtang nagpabilin nga naka-alerto ang MDRRMO, Quick Response Team sa PDRRMO ug mga ahensya sa pagtubag sa panginahanglan alang sa mga nahibilin nga residente.
