Gipataas na sa Department of Social Welfare and Development (DSWD) ngadto sa Red Alert ang national disaster response status niini samtang padayon nga gimonitor ang grabeng epekto sa Habagat sa daghang bahin sa Luzon ug Visayas. Gipataas usab sa National Disaster Risk Reduction and Management Council (NDRRMC) ang ilang National Disaster Response Status ngadto sa labing taas nga lebel nga Red Alert.
Sumala sa pinakabag-ong report sa PAGASA, gilauman nga magpadayon ang ting-ulan sa tibuok Luzon ug Visayas karong weekend, ilabi na sa mga lugar sa Western Luzon. Tungod niini, gipasalig sa DSWD nga andam ang tanan nilang field offices, samtang nakaposisyon na usab ang mga relief resources sa nagkadaiyang rehiyon.
Sa pagkakaron, kapin 3.4 milyon ka Family Food Packs (FFPs) ang gitipigan sa mga bodega ug strategic locations sa tibuok nasod. Aduna usab ang ahensya og P558.77 milyon nga Quick Response Fund (QRF) nga mahimong gamiton alang sa dinaliang paghatag og tabang ug disaster response.
Padayon usab ang koordinasyon sa DSWD uban sa mga local government unit (LGU) ug uban pang ahensya sa gobyerno aron masiguro ang paspas nga pagpadala sa tabang ngadto sa mga pamilyang posibleng maapektuhan sa pagbaha, manginahanglan og paglikas, o adunay uban pang panginahanglan.
Samtang, base sa pinakabag-ong tala sa NDRRMC, 104 ka lokalidad sa nasod ang mipahibalo og State of Calamity tungod sa hiniusang epekto sa mga niaging Bagyong Luis, Maymay ug Neneng, nga misamot pa tungod sa padayon nga pag-iral sa Habagat.
