GENERAL SANTOS CITY – Balhog sa selda karon sa Philippine Drug Enforcement Agency (PDEA) 12 ang lima katao sa gipahigayong buy-bust operation sa Purok Malipayon, Brgy. Apopong, ning syudad kagahapon.
Matud pa kang PDEA 12 Director Naravy Duquiatan, target sa buy bust operation si Kim Bautista alyas Jay-Ar, 28 anyos nga residente sa Ilang-Ilang street, Barangay Poblacion, Polomolok, South Cotabato kung asa natigayon ang transakyon sa droga sa balay ni Aldrico Lubaton III, 21 anyos, negosyante og residente sa Purok Malipayon, Brgy. Apopong.
Dinhi nadiskubre sa otoridad nga ang balay ni Lubaton ginahimong drug den og sa lugar nadakpan ang uban pang drug suspects nga silang Jim Rueal Dumanjog, 28 anyos; Princess Aquino, 22 anyos og Ian Paul Escobañez, 21 anyos nga parehong residente sa Polomolok, South Cotabato.
Nakumpiska atol sa operasyon ang 3 ka gagmay og duha ka medium sachets sa suspected shabu nga 11 gramos kabug-aton nga gibanabanaang nagkatindad og P74,800, drug paraphernalia og P500.00 buy-bust money.
Sa pahayag ni Dir. Duquiatan nga dugay nang namonitor ang mga nasampit isip mga bag-ong drug personalities apan wala pa maapil sa ilang watchlist.
