GENERAL SANTOS CITY – Nagpabilin sa kustodiya sa Traffic Management Unit ang driver sa kotse nga nakabangga sa motorsiklo nga miresulta sa pagkamatay sa habal-habal driver ug pasahero niini kaniadtong Sabado sa buntag.
Gilaumang ning adlawa kasuhan ang nahisgutan nga giilang si Billy Yuson nga taga Tambler ning dakbayan.
Kahibaluan nga ang mga namatay nga biktima giilang silang Roger Rallos, taga Marayat, Puting Bato, Calumpang ug ang backrider niini nga si Rosenda Rola, 54 anyos residente usab sa maong lugar.
Kahibaluan nga paspas kaayo ang pagpadagan sa kotse paingon sa direksyon sa Makar dihang kalit mibuto ang atubang nga ligid hinungdan nga iyang gidaro ang nakatagbo nga motorsiklo.
Gumikan sa kakusog sa pagbangga nalabay ang duha ka biktima ug diha-diha nakabsan sa kinabuhi samtang gidala sa hospital si Rola apan gideklara usab nga dead on arrival.
Padayong giimbestigahan sa mga otoridad ang naasoy’ng aksidente.
