Nagpahayag si DPWH Secretary Vince Dizon nga kampante siya sa kabug-aton sa mga ebidensiyang ipresentar batok kang Leyte Representative Martin Romualdez, nga ig-agaw sa presidente.
Sa usa ka interbyu, gikwestyon ang kalihim nganong wala pa gihapon mapailalom sa aktuwal nga kaso si Romualdez bisan pa man sa paghisgot sa iyang ngalan sa pipila ka mga resource person atol sa mga pagdungog sa Senado ug House of Representatives.
Matod ni Dizon, padayon nga naglihok ang legal nga proseso batok kang Romualdez ug naglaom siya nga sa dili madugay masumite na ang kaso ngadto sa korte sama sa Sandiganbayan.
Gisulti usab sa kalihim nga lig-on ang mga ebidensiya batok sa kanhi House leader ug siya mismo ang nagrekomendar ug nagsumite niini ngadto sa Office of the Ombudsman niadtong Nobyembre 30, 2025.
Sumala pa kaniya, ang maong mga ebidensiya maoy nakatabang aron makapagpagawas ang korte og freeze order sa mga kabtangan ni Romualdez ug makapahamtang og pagdili kaniya sa pagbiyahe gawas sa nasud.
Gipasiugda ni Dizon nga bisan daghan ang gustong makakita nga mapasakaan dayon og kaso o mapriso ang kanhi House leader, kinahanglan gihapon nga sundon ang hustong legal nga proseso sa pagpasaka sa kaso, sama sa nahitabo sa mga kaso nila ni Senador Jinggoy Estrada ug uban pang mga indibidwal nga anaa karon sa prisohan tungod sa mga kontrobersiyal nga flood control projects.
Hinumduman nga si Martin Romualdez maoy Speaker of the House sa panahon nga naporma ang 2025 National Budget, nga gihulagway sa pipila ka sektor isip usa sa labing kontrobersiyal nga national budget tungod sa giingong ilegal nga mga insertion.
Niadtong panahona, si Zaldy Co usab maoy chairman sa House Appropriations Committee ug karon nag-atubang og daghang kaso tungod sa alegadong kalambigitan sa iyang kompanya nga Sunwest Corporation sa gitawag nga ghost flood control project.
