GENSAN- Nangayo og klarong aksyon si General Santos City Lone District Representative Shirlyn Bañas-Nograles sa Department of Public Works and Highways (DPWH) Secretary Manuel Bonoan ug sa Commission on Audit (COA) kabahin sa pagka-delatar sa underpass project sa national highway sa GenSan.
Matod sa kongresista, gisulatan niya ang duha ka ahensya aron mapadangat ang sitwasyon sa maong proyekto og masuta kung unsa ang mga rason nga hangtod karon wala pa mahuman nga nakaapekto na pag-ayo sa dagan sa negosyo duol sa maong proyekto.
Gibutyag ni Bañas-Nograles nga bisan pa nga naghulat pa sila sa report sa COA, mipadala na ang DPWH Central Office og team nga nagbisita kaduha sa usa ka bulan sa GenSan aron masuta ang kahimtang sa proyekto.
Base sa geo-technical assessment, ang gilawmon sa tubig misaka og 8 metros, apan sa dihang gi-excavate ang proyekto, 4 metros lang ang katas-on sa tubig nga maoy sinugdanan sa problema.
Base sa personal niyang assessment nga nag-over excavate ang kontraktor nga hinungdan nga nisugod og gawas ang tubig gikan sa ubos.
Gidugang pa niya nga adunay gihimo nga request for variation order aron ma-install ang mga pipelines nga moagi padulong sa outfall, apan ang pag-apruba niini nadugay ug hapit usa ka tuig una naaprubahan.
Kini maoy dakong hinungdan sa pagkadelatar sa proyekto.
