Opisyal na nga gipanganlan si kanhi Presidente Donald Trump isip presidential candidate sa Republican party alang sa November 2024 presidential elections kung asa subli niining nga makaatbang ang Democrat ug kasamtangang Presidente nga si Joe Biden.
Nahitabo kini sa pagtipon sa Republicans sa usa ka national convention sa Milwaukee sa Wisconsin kung asa gianunsyo usab nga si Ohio Senator JD Vance, 39, mao ang mahimong vice presidential runningmate ni Trump.
Nahimong kritiko ni Trump si Vance kaniadtong 2016 apan makalabay ang panahon, nagtindog na kini isip usa sa staunchest defenders sa kanhing presidente ug gidapigan pati ang statement niini nga adunay mga iregularidad sa resulta sa 2020 election.
Kini na ang ikatulo nga eleksyon nga pangunahan ni Trump ang Republicans kung asa nadag-an niini ang pwesto kaniadtong 2016 apan napildi sa kamot ni Biden kaniadtong 2020.
Kahibaluan nga binulan na nga ginakonsidera si Trump nga presumptive nominee, apan ang boto sa mga delegado sa Republican National Convention mao ang naghimo niini nga opisyal nga nominasyon.
Ang pagpili kang Trump ang nahitabo pipila ka adlaw lang human nakaluwas kini sa usa ka assassination attempt dungan sa usa ka campaign rally sa Pennsylvania kung asa nasamaran ang iyang dalunggan, napatay ang 20-anyos nga shooter, ug napatay usab ang usa ka firefighter nga kabahin sa mga nagtambong sa maong event.
