Nagtuo ang Department of Health nga adunay epekto ang climate change sa sayo nga pagsaka sa kaso sa dengue karong tuiga.
Matud sa tigpamaba sa DOH ug Asec. Albrt Domingo, sayo nga nagsugod ang ting-ulan sa nasud tungod sa weather patterns sama sa shearline, ITCZ, ug easterlies nga kasagarang masinatian sa Hunyo ug Hulyo.
Nasayran nga daghang mga lugar sa Metro Manila ang mideklara na og dengue outbreaks, apan anam-anam nga nagkunhod ang ihap sa mga bag-ong kaso karong semanaha.
Mas ubos ang mortality rate sa maong sakit karong tuiga, nga anaa sa 0.36% lamang kon itandi sa 0.43% sa susamang panahon sa tuig 2024.
Kini nagpasabot nga sa matag 1,000 ka pasyente, tulo ngadto sa upat ang mamatay.
Bisan pa niini, subling gipahimangnuan sa ahensya ang publiko nga dili magkumpyansa, tungod mahimong musaka na usab ang mga kaso sa dengue kung dili ipadayon ang pagpanglimpyo ug uban pang pag-amping.
Gitambagan usab ang publiko nga magpahiling dayon sa doktor kung makasinati og mga sintomas sa dengue aron malikayan ang grabeng mga kondisyon.
