Gipasalig sa Department of Health (DOH) nga kontrolado pa gihapon sa ahensya ang pagtaas sa mga kaso sa Monkeypox (Mpox) sa nasud, bisag mitaas ang natakdan sa maong sakit sa ubang mga dapit.
Matud ni Health Secretary Teodoro Herbosa, mas ubos gihapon ang mga kaso karong tuiga kumpara sa kaparehong panahon sa tuig 2024.
Gidugang ni Herbosa nga gipalig-on na sa DOH ang kampanya sa edukasyon, pagtambal, ug isolation aron mapugngan ang mas halapad nga pagkaylap sa sakit.
Wala gisulti sa kalihim kung asa nga mga lugar nakita ang bag-ong mga kaso, apan klaro nga Clade II variant mas mild ug kasagaran magmaayo bisag walay dakong medikal nga intervention.
Giklaro usab sa DOH nga wala naapil ang Pilipinas sa mga nasud nga sakop sa Public Health Emergency of International Concern nga gideklarar sa World Health Organization (WHO), nga nakatutok lang sa mas grabe ug mas dali nga makatakod nga Clade Ib variant.
Nagpabilin ang DOH sa panawagan sa publiko nga magpabiling alerto, magpakabana, ug musunod sa mga health protocols aron malikayan ang pagkatap sa maong sakit.
