Maghatag og suporta ang Department of Migrant Workers o DMW kang Mary Jane Veloso, lakip ang psychosocial ug panginabuhian nga tabang, human siya hatagan og absolute pardon sa Malacañang.
Sumala kang Palace Press Officer Undersecretary Claire Castro, kabahin sa padayon nga programa sa DMW ang psychosocial counseling, livelihood starter kits, kapital alang sa pagnegosyo ug skills training aron matabangan si Veloso ug iyang pamilya sa ilang pagbalik sa normal nga kinabuhi.
Matud pa ni Castro, padayon ang mga lakang sa ahensya aron masiguro ang hapsay nga reintegration ni Veloso ug sa iyang pamilya sa ilang bag-ong yugto sa kinabuhi.
Samtang, naghatag ang Department of Social Welfare and Development o DSWD Field Office 3 og 30 mil pesos nga cash assistance kang Veloso. Nakadawat usab og 10 mil pesos ang iyang mga ginikanan, samtang 30 mil pesos usab ang gihatag alang sa iyang mga anak.
Mainiton usab nga gisugat si Veloso sa iyang mga paryente ug suod nga mga higala sa iyang pagbalik sa Barangay Burol human sa 16 ka tuig.
Nahinumdoman nga gisentensiyahan si Veloso og kamatayon sa District Court of Justice of Sleman sa Yogyakarta, Indonesia niadtong Oktubre 11, 2010. Miapela dayon alang kaniya ang kanhi Presidente Benigno Aquino III.
Gipadayon ni Veloso ang iyang pamahayag nga inosente siya ug wala siya masayod nga gigamit siya isip tigdala sa ilegal nga droga.
