GENERAL SANTOS CITY – Gipapha ni OPAPP Sec. Jesus Dureza ang kahadlok ug kabalaka sa katawhan sa gihimong pagdeklara ni Pangulong Rodrigo Duterte ug 60-day Martial law sa Mindanao.
Sa eksklusibong pakighinabi sa Bombo Radyo Gensan, gibutyag ni Sec. Dureza nga bugtong tumong niini nga maprotektahan ang katawhan sa nagpadayong kagubot sa Marawi City, nga makonsidera matud pang usa ka emergency situation.
Hinungdan nga inay nga mahadlok ug mabalaka, mas maayo matud pang dawaton sa katawhan ang naasoy’ng lakang sa gobyerno, dungan sa pagka-alerto batok usab sa mga miltar nga posibleng manghinobra sa pagpatuman ug martial law.
Giklaro usab ni Sec. Dureza nga gideklara sa pangulo ang martial law sa tibuok Mindanao aron dili na mukatag pa sa ubang lugar sa nasud ang nagpadayong kagubot sa Marawi City.
Gikonsidera usab sa kalihim isip usa ka “very decisive move” ang gihimong lakang sa pangulo. Dungan niini, giawhag ni Sec. Dureza ang katawhan nga dili magduda inay suportahan ang naasoy’ng lakang sa pangulo, hilabi na nga usa kini sa gikinahanglan karon sa gobyerno.
Gipaniguro usab sa naasoy’ng opisyal nga in full control gihapon ang gobyerno sa sitwasyon ug himuon ang tanang gikinahanglang lakang ug estratehiya sama sa pagpatuman ug curfew, aron mapanalipdan ang katawhan.
