Mibalik ang tensyon tali sa depensa ug prosekusyon atol sa cross-examination sa saksi nga si Xylene Mae Del Campo gikan sa Commission on Audit (COA) sa ika-15 nga adlaw sa impeachment trial ni Bise Presidente Sara Duterte karong Miyerkules, Agosto 12.
Gipuna ni Prosecution Counsel Atty. Lorna Kapunan ang giingong pagpahunong ni Defense Counsel Atty. Kristine Ferrer samtang nagsulti pa lamang ang testigo.
Gireklamo usab sa depensa ang dili direktang pagtubag sa testigo sa iyang mga pangutana nga “yes or no.” Giinsistir usab niya nga adunay higayon ang prosecution counsel nga mangutana og clarificatory questions atol sa redirect examination.
“I’m on cross, your honor, please,” matud ni Atty. Ferrer.
Apan mitubag si Kapunan: “Never mind if you are in cross. There are limits to cross-examination. Misleading questions are not allowed to cross.”
Niini nga higayona, nangilabot si Presiding Officer Francis Escudero tungod sa iyang obserbasyon nga daw adunay “generational divide” tali sa defense ug prosecution counsel.
Sa ulahi, gamay nga mihupay ang tensiyon sa Impeachment Court human miingon si Atty. Ferrer nga dako ang iyang respeto kang Atty. Kapunan.
Mitubag usab ang private prosecutor: “Let’s end here. It might sound like a eulogy, your honor, I’m still very much alive.”
