Magpatuman ang Department of Education (DepEd) og bag-ong mga sumbanan aron masiguro nga ang mga bag-ong pampublikong eskwelahan sa nasud lig-on batok sa mga kalamidad ug daling ma-access sa mga tawo nga adunay kakulangan (PWDs).
Subay sa DepEd Order No. 022, series of 2026, ang mga pasilidad sama sa mga rampa alang sa wheelchair, tactile paving, ug mga kasilyas nga haom alang sa mga PWD mahimong mandatory o gikinahanglan na.
Ang pagpatuman sa bag-ong mga sumbanan magsugod sa Fiscal Year 2027, nga mopuli sa mga naunang giya nga gipagawas niadtong 2017 ug 2021.
Ang sumbanan nga gidak-on sa classroom itakda usab sa 63 square meters alang sa kinatas-ang gidaghanon nga 40 ka estudyante, uban ang rekisitos nga masiguro ang hustong bentilasyon sulod sa lawak.
Dugang pa, ang mga bag-ong bilding sa eskwelahan kinahanglan nga makasugakod sa kakusog sa hangin nga moabot sa 340 kilometros matag oras—nga katumbas sa usa ka super typhoon—ingon man sa linog nga adunay magnitude nga 8.
Matod ni Education Secretary Sonny Angara, ang bag-ong mga sumbanan nagtumong sa pagmugna og luwas, inklusibo, ug haom nga palibot sa pagkat-on alang sa tanang estudyante.
