Gikalipay sa defense team ni Bise Presidente Sara Duterte ang desisyon sa Korte Suprema nga nagdeklara sa articles of impeachment batok kaniya nga unconstitutional.
Sumala sa opisyal nga pamahayag sa iyang defense team, ang desisyon sa Korte Suprema nagpalig-on sa ilang pagtuo nga ang ikaupat nga impeachment complaint nakalapas sa usa ka tuig nga pagdili nga gilatid sa Article XI, Section 3(5) sa 1987 Constitution.
Ilang gihingusgan nga ang unanimous decision dili lang kadaugan sa Bise Presidente, kondili pagpalig-on usab sa lagda sa balaod ug pasidaan batok sa sayop nga paggamit sa proseso sa impeachment.
Gipasalig sa grupo nga andam silang motubag sa bisan unsang alegasyon sa saktong panahon ug sa tukmang forum.
Kaniadtong Disyembre 2024, upat ka impeachment complaints ang gisang-at batok kang VP Duterte. Ang mga kaso naglakip sa graft and corruption, betrayal of public trust, ug ang kontrobersyal nga pag-angkon sa plano sa pagpatay kang Presidente Marcos, First Lady Liza Araneta, ug House Speaker Martin Romualdez.
Ang ikaupat nga reklamo gisang-at niadtong Pebrero 5, 2025, ug gi-endorso sa 215 ka membro sa House of Representatives, ug gipasa ngadto sa Senado para husayon.
Bisan pa niini, kaniadtong Hunyo 2025, ang Senado nakahukom nga ibalik ang mga articles of impeachment sa Kamara, imbes nga ipadayon ang pagsulay.
Sa kataposan, ang Korte Suprema nipagawas og desisyon nga nagdeklara sa ikaupat nga reklamo nga unconstitutional tungod sa paglapas sa usa ka tuig nga lagda.
