Kapin sa 3,000 ka mga tawo ang namatay sa magnitude 7.7 nga linog sa Myanmar samtang ang mga rescuer nagpadayon sa pagpangita sa mga nahugno nga mga building .
Matud sa Embassy of Myanmar sa Japan, nisaka sa 3,003 ang namatay sa linog samtang 4,515 ang naangol ug 351 ang missing.
Ang mga relief workers nahadlok karon sa posibilidad sa pag-ulan human nipasidaan ang mga weather officials nga masinati kini gikan sa Domingo hangtod Abril 11 nga mahimong hulga sa mga lugar nga grabeng naigo sa linog sama sa Mandalay, ug sa Naypyidaw.
Gitaho usab sa embahada nga adunay 53 ka mga airlift sa mga hinabang ngadto sa Myanmar samtang kapin sa 1,900 ka mga rescue workers ang nangabot gikan sa 15 ka mga nasud lakip na ang mga silingang nasud sa Southeast Asia sama sa Pilipinas ingon man sa China, India, ug Russia.
Samtang, sa Thailand, nga naigo usab sa kusog nga linog, ang pagpangita sa mga naluwas nagpadayon.
Gigamit usab sa mga rescuers ang mga mechanical digger ug bulldozer aron gub-on ang 100 ka toneladang konkreto aron masubay ang mga naluwas.
Ang linog nagbilin sa kinatibuk-an nga 22 ka mga tawo nga namatay samtang 72 ang missing sa Thailand.
