GENERAL SANTOS CITY – Padayong gina-imbestigahan sa mga otoridad ang kamatayon sa usa ka dalaga human gidaro kini sa usa ka sakyanan nga mibangga kaniya samtang iyang maneho ang motorisiklo.
Ang insidente natigayon sa Diversion Road, Prk Paglangan, Brgy. Apopong duol sa usa ka restaurant pasado alas 12 sa sayung kabuntagon.
Giila ang biktima nga si Rachel Sulanting, 24 anyos nga residente sa Prk Balunto, Brgy. Labangal ning syudad.
Sumala pa sa Traffic Enforcement Unit Gensan nga nakaangkon og mga dagkong samad sa lawas ang biktima hinungdan sa iyang kamatayon.
Sa inisyal nga imbestigasyon, gikan sa Apopong round ball, ginasubay sa biktima sakay sa iyang motor ang Diversion road og gisundan kini sa usa ka puti nga sakyanan.
Pag abot sa nahitabuan, kalit nga gibangga sa suspek ang babaye.
Gikaingong nadaro sa sakyanan ang biktima nga anaa sa gibanabanaang 650 metros ang gilay-on gikan sa iyang motorsiklo.
Naabtan nalang sa mga kapulisan nga mikatag sa dalan ang dugo sa biktima ug paksit na ang pipila ka parte sa panglawas hinungdan sa hinanaling kamatayun niini.
Samtang ang suspek ang misibat human sa panghitabo.
