GENERAL SANTOS CITY – Kalangan sa processing sa mga papeles sa mga departamento ang gitudlong hinungdan ni Ferdinand Pareja ang labaw sa Sanitary Landfill nganong dili maka operate ang ilang bulduzer nga magtokmod sa mga gilabay nga basura .
Giangkon ni Pareja nga mitabang na ang mga Kapitan aron sa pagtampo ug krudo aron muandar ang buldozer aron mahipos ang mga basura.
Matud niini nga naulaw na sila sa ginautangan nila ug krudo tungod nagpatong patong na ang ilang purchased request mao nga nangita sila ug opsyon . .
Gani nakalabay nga semana matud pa nakigkita ang supplier sa taga City Hall aron mapadali ang pagbayad sa syudad aron makabalik na pagpangutang ug krudo ang mga heavy equipment sa syudad.
Nakalabay nga semana nakadawat ug impormasyon ang Bombo Radyo nga ginapangayu-an ug dyes litros nga krudo ang matag sakyanan nga gahakot ug basura aron itubil sa buldozer butang nga gipanghimakak ni Pareja.
Gisaysay niini nga matag adlaw nagkinahanglan ug 100 liters nga krudo ang buldozer aron kini maka operate.
Gani makatabang matud pa ang nahisgutang buldozer nga tigbira kung malubong ang mga sakyanan nga maglabay ug basura.
Matag adlaw matud pa may usa ka gatus ka tonelada nga basura ang ginalabay sa lugar. Gipaklaro niini nga tanan halos nga departamento ang nakasinate sa maong problema.
Matud niini nga kung malangan lamang ug tulo ka adlaw nga dili matabunan ang mga basura maglisod na sila sa pagtabon niini.
