Naggahin ang Department of Agriculture ug labing menos P300 milyon para sa 2026 aron mapalapdan ang climate-resilient nga pagpanguma sa mga high-value nga utanon sama sa kamatis, pepino ug bell pepper.
Sumala ni Agriculture Secretary Francisco Tiu Laurel Jr. nga ang pondo gigahin para sa mga basic greenhouse, drip irrigation, ug water-impounding systems aron masiguro ang hustong pagdumala sa mga tanom ug makunhuran ang kadaot nga gipahinabo sa nag-usab-usab nga panahon.
Dugang ni Laurel nga ang katuyoan sa inisyatibo mao ang pagpugong sa balik-balik nga pagsaka sa presyo sa mga palaliton tungod sa mga pagkalangan sa suplay nga may kalabutan sa panahon.
Kini tungod kay matag tuig ang mga high-value nga utanon makasinati ug grabe nga pag-usab-usab sa presyo tungod sa init nga panahon, kusog nga ulan ug baha nga makaguba sa produksiyon.
Ubos sa inisyatibo nga “White Revolution”, ang DA mag-instalar usab ug mga rain shelter ug mas simple nga mga istruktura sa greenhouse aron mapanalipdan batok sa kusog nga ulan ug makunhuran ang pagbaha ug kadaot sa peste sa mga tanom sa mga mag-uuma.
