Gitapos na sa Department of Agriculture (DA) ang draft bill nga nagtumong sa pagpalig-on sa kapasidad sa National Food Authority (NFA) sa pag-stabilize sa presyo ug suplay sa bugas.
Matod sa DA, ang maong balaodnon nagtumong sa pag-usab sa mga polisiya sa gobyerno ug pagpalig-on sa food security.
Hatagan usab niini og otoridad ang NFA sa paghimo dayon og mga desisyon aron mapadayon ang suplay sa bugas.
Usa kini sa gipangayo nga solusyon ni House Speaker Ferdinand Martin Romualdez aron suportahan ang P20 nga programa sa bugas ni Presidente Ferdinand Marcos Jr. ubos sa Benteng Bigas Meron na (BBM).
Ang draft bill mag-amendar usab sa Rice Tarrification Law aron tugotan ang NFA sa pagbaligya ug pagdumala sa buffer stock niini.
Pinaagi sa regulasyon, mahatagan ang NFA og katungod sa pagdumala sa buffer stocks alang sa paspas nga pag-apod-apod sa bugas, nga mopaspas ug epektibo sa pagtubag sa panginahanglanon sa publiko.
