GENSAN – Nanawagan si Department of Agriculture (DA) Region 12 Regional Director Roberto Perales sa tanang konsumidor sa rehiyon nga suportahan ang lokal nga bugas imbes nga mopalit og imported aron mapalig-on ang sektor sa agrikultura ug mabuhi ang panginabuhian sa mga mag-uuma.
Matod ni Perales, posibleng mosaka gamay ang presyo sa lokal nga bugas tungod sa gasto sa produksyon apan kini usa ka mahinungdanon nga lakang aron dili mapakyas ang atong mga mag-uuma ug magpadayon ang produksyon sa rehiyon.
Gisaysay usab sa opisyal nga gareklamo na ang daghang mag-uuma sa Region 12 tungod sa pagsulod sa imported rice nga mas barato mapalit, nga nagresulta sa pag-ubos sa presyo sa ilang mga ani.
Bisan pa niini, gisiguro sa DA-12 nga padayon ang paningkamot sa gobyerno sa pagbalanse sa sektor sa bugas pinaagi sa suporta sa mga lokal nga produkto ug pagpatuman sa mga programa alang sa kalig-on sa agrikultura.
Gihangyo ni Perales ang publiko nga pilion ug kan-on ang lokal nga bugas isip konkreto nga paagi sa pagtabang sa ekonomiya sa rehiyon ug sa pagpalig-on sa kaugalingong sektor sa agrikultura
