GENERAL SANTOS CITY -Gipasalamatan ni Commissioner Edwin Espejo si Pangulong Rodrigo Duterte sa pagsalig kaniya human gitudlo nga usa sa pito ka commissioner nga magdumala sa National Commission of the Senior Citizen.
Matud sa kanhi newswriter nga karon Commissioner Espejo nga ang ilang buhatan naa ilawom sa Office of the President.
Sa kasamtangan upat na ka commissioner pa lamang anaa sa pwesto og pwede na nga makahimo sa ilang mandato tungod may quorom na sa matag tigum.
Gipaklaro niini nga bisan ug kulang pa ug tulo ka Commissioner apan nagsugod na sila sa ilang mandato aron sa pagpanday ug Implementeng Rules and Regulation (IRR) sa Republic Act 11350 alang sa kaayuhan sa mga senior citizen.
Giangkon niini nga dako pa ang ilang trabahuon aron matutukan gayud ang mga kaayuhan alang sa mga senior citizen nga naa pa sa pagdumala sa Department of Social Welfare and Development (DSWD).
Sa kasamtangan gipahapsay na sa buhatan ang trabaho nga ilang atimanon ug kung mahuman na ang pagpanday niini ilang isumite ngadto sa buhatan ni Pangulong Duterte alang sa approval.
Usa sa ilang pagatutukan ang monthly pension sa mga senior citizen nga P500 matag bulan nga daghan ang nagreklamo nga wala makadawat.
Possible pa nga niining bulana ilang pakigkitaan ang taga DSWD alang sa turn over sa maong programa.
