GENERAL SANTOS CITY – Gihingusgan ni Coach Buboy Fernandez nga alang sa ‘glory and honor’ sa nasud ug dili lang alang sa salapi hinungdan nga padayon nga nakig-away si Sen. Manny Pacquiao.
Sa usa ka interview, gibutyag sa Pinoy coach nga ang tanang pagpaningkamot nga ginahimo nila, ug ang kalisod nga ginaantos sa fighting senator sa iyang pagbansay, kung asa gasaka kini sa mga bukid aron mahimong lig-on ang mga batiis ug mahimong andam sa umaabot nga away ang alang tanan sa tumong nga masakmit ug balik ang korona alang sa nasud ug sa tanang Pinoy.
Una niini, kahibaluan nga may mga gasaway sa senador, kung asa gikabutyag nga alang sa salapi na lang ang gikatakda niining away kang Lucas Matthysse sa umaabot nga petsa 15 ning bulana.
Apan gihingusgan ni Coach Buboy nga dili kini tinuod, gumikan si Matthysse ang usa usab ka maayong boksidor, hinungdan nga dili angayang ipakamemos ang naasoy’ng comeback fight ni Sen. Pacquiao.
Kahibaluan nga sa Hulyo 9 na mubiyahe ang Team Pacquiao padulong sa Kuala Lumpur, Malaysia, alang sa away nga matigayon sa petsa 15, sa Axiata Arena sa naasoy’ng nasud.
Dungan niini, padayong nanawagan si Fernandez ug pag-ampo gikan sa publiko alang sa Pambansang Kamao, aron magmalampuson kini sa away, ug subling mabalik ang dungog ug himaya alang sa nasud.
