GENERAL SANTOS CITY -Kontrolado na sa City Veterinary Office ang paglihok sa virus sa baboy sa Purok San Lorenzo Ruiz, Apopong ning syudad.
Kini ang gipasalig ni City Vetirinary Officer Dr. Antonio Marin dihang miatubang sa konseho kagahapong adlawa.
Nagsugod ang pagkatag sa virus dihang nag import ug baboy gikan sa lugar nga may african swine fever (ASF) ug gidala sa lugar apan wala pa mabutyag ang mihimo niini.
Sa miaging Enero 24 dihang nagpadala ug sample sa Animal Disease Laboratory sa Department of Agriculture ug migawas nga nagpositibo sa ASF ang usa sa upat ka sample nga gisumite.
Nagpahigayon dayon ang rapid population survey sa lugar ug gipahibalo ang mga commercial hog raisers sa infection ug dayon ilang gisulod ang lugar ug gipangkuha ang mga baboy.
Matud ni Dr. Marin nga tulo ka adlaw una nahurot ug kuha ang mga baboy sa lugar.
Gipaniguro usab nga matag tulo ka adlaw may ipahigayon nga pag-disinfect sa ground zero aron hingpit mapuo ang virus.
