GENERAL SANTOS CITY – Angayan nga imbestigahan sa Konseho ning syudad ang resulta sa partisipasyon sa Gensan sa Batang Pinoy human nahimong puraot sa mga medalya ang mga atleta sa syudad.
Kini ang pahayag ni Jojo Entila, Wushu tournament director sa Gensan nga nadismaya sa City Sports human nag endorso ug mukapin kwarenta ka mga atleta nga champion sa pipila ka tournament apan wala matud pa makadula sa Batang Pinoy tungod dili tournament ang gibasihan sa maong buhatan sa pagpili ug magdudula kundi credentials.
Gikatingala usab ni Entila nga walay pakialam ang LGU sa selection sa mga players nga ipadala sa maong padula luyo nga gigahinan kini ug lima ka milyon ka pesos.
Matag magdudula may budget alang sa tiket sa eroplano, bus , meal allowance, uniform apan pag-abut nila sa Manila gitagbo sila ug giingnan nga mukapin sa trenta ka player ang dili makaapil sa competition tungod dili registered sa sports commission.
Gani misulat matud sa Philippine sports commission si Gensan Mayor Lorelie Pacquiao aron makadula tanan ang mga atleta gikan sa dakbayan apan wala paminawa ang naasoy nga hangyo.
Laing isyu nga gibutyag ni Entila nga naulahi pagkuha ug tiket sa eroplano ang mga bata hinungdan nga gikaltasan ug tig dos mil matag usa.
Matud ni Entila nga kini ang unang higayon nga wala makasulod sa top 10 ang Gensan luyo nga gibansagan kini nga Home of the Champions.
