GENERAL SANTOS CITY – Naghatag ug ultimatum si City PNP Director Police Senior Supt. Raul Supiter ngadto sa mga “lubog” nga pulis nga magbag-o na.
Matud pa ni Col. Supiter nga ang “lubog” nga mga pulis mao kadtong mga gabayad sa ilang kauban aron maoy magduty sa iyang schedule nga duty.
Gibutyag sa nasampit nga opisyal nga may nadunggan siya nga mga susamang gimbuhaton sa General Santos City Police Offce, apan hugot pa niyang giimbestigahan.
Samtang, gibutyag ni Kag. Franklin Gacal Jr. atul sa sesyon sa Sangguniang Panglungsod kagahapong adlawa nga sa iyang nasayran nga P12,000 ang ginahatag sa mga pulis sa ilang opisyal bugti sa pagtugot nga dili sila mu-report sa ilang duty inay ang ilang gibayran nga kauban.
Dugang pa ni Gacal nga sa Pendatun POlice Station adunay tulo ka mga lubog nga pulis. Dungan niini iyang gipahimangnuan ang mga nasampit nga dili na hulaton nga i-mention pa niya ang ilang mga pangalan ug angkunon na ang iligal nga gimbuhaton.
Kahibaluan nga human sa sesyon, nagpatawag matud pa ug emergency meeting si Col. Supiter alang sa tanang mga chief of police sa siyudad.
