GENERAL SANTOS CITY – Padayon ang hugot nga kampanya sa City Environment and Natural Resources kon CENRO batok sa pagpanguling ug illegal logging ug mining, alang sa mas limpyo nga palibot ug mapanalipdan ang kinaiyahan.
Kini ang gipasalig ni Abdul Cariaga, officer in charge sa CENRO.
Ug gani, ubay-ubay na matud pa ang natala nga nadakpan sa kapulisan nga mga sakyanan nga may karga nga uling o pinutol nga kahoy, human nga walay napakita nga transport permit gikan sa DENR.
Hinungdan nga may mga napasakaan na usab matud pa sila ug kaso.
Dungan niini, nagpahimangno si Cariaga sa kinsa man nga may susamang buluhaton, nga mag-atubang sila ug kaso.
Sa mga gauling-uling nga nakasupak sa Section 77 sa Presidential Decree No. 705 o Revised Forestry Code of the Philippines, kumpiskahon ang sakyanan nga gikargahan, apil na ang uling mismo, gawas pa sa kaso nga atubangon.
Kalabot sa iligal nga pagmina, wala matud pay large scale mining nga natala dinhi sa siyudad base sa ilang monitoring, samtang ang mga small-scale sama sa sand and gravel, wala matud pa silay natala nga iligal, gawas na lamang sa pipila ka reklamo sa ginagmay’ng kalut-kalot, nga kulang ug ebidensya aron kasuhan.
Sa bahin sa iligal nga pagbiyahe ug mga pinutol nga kahoy ug uban pang forest products, mag-atubang usab matud pa ug kaso ang responsable, ug kumpiskahon ang sakyanan ug mga karga nga produkto.
