GENERAL SANTOS CITY – Giklaro ni Atty. Rogelio Garcia nga walay hurisdiksyon ang unsa mang lower courts sa kaso kabahin sa isyu sa Kapa-Community Ministry International, Inc.
Sa pakighinabi sa Bombo Radyo GenSan, gibutyag ni Atty. Garcia nga balewala ang 20 adlaw nga Temporary Restraining Order nga gi-isyu ni Presiding Judge Oscar P. Noel Jr. kaniadtong Marso 15 human ang gisumiteng petisyon sa KAPA founder nga si Joel Apolinario.
Nasayran nga may P20 Million bond si Apolinario alang niini. Una niini, gibutyag sa SEC nga gideklarang “denied” ni Presiding Judge Joyce Kho Mirabueno sa Regional Trial Court Branch 58 sa GenSan ang gisumiteng mosyon sa kampo ni Apolinario nga mihangyo nga magpagawas og 72-hour-TRO batok sa gipagawas sa SEC nga Cease and desist order.
Kagahapon dihang gipagawas sa SEC ang latest order nga nagpalig-on sa CDO nga ilang gipagawas kaniadto batok sa KAPA.
Matud sa komisyon nga ang CDO ang mamahimong permanente na.
Hinungdan nga ang gi-isyu ni Judge Noel nga TRO sa CDO batok sa KAPA ang walay bili.
Kabahin niini, sumala kang Atty. Garcia nga kinahanglang mulihok na ang PNP, NBI og uban pang concerned agencies aron ipatuman dayon ang ‘enforcement’ human sa gi-isyu sa SEC nga CDO.
