Nilagda ang Bangko Sentral ng Pilipinas (BSP) og managlahing mga kasabutan sa pagpaambit og impormasyon (ISA) uban sa National Bureau of Investigation (NBI), Cybercrime Investigation and Coordinating Center (CICC), ug Securities and Exchange Commission (SEC).
Kini nga mga kasabutan nagtumong sa pagtugot sa legal nga pagpaambit sa kompidensyal nga impormasyon sa pinansyal nga account aron masuportahan ang mga imbestigasyon batok sa mga scam ug mga may kalabutan nga paglapas.
Girepresentahan ni BSP Governor Eli Remolona, Jr., ang BSP General Counsel Roberto L. Figueroa mipirma sa kasabutan sa BSP Head Office sa Manila kagahapong adlawa. Mitambong usab sila si NBI Acting Director Angelito DLP. Magno, CICC Executive Director Renato A. Paraiso, ug SEC Chairperson Francisco ED. Lim.
Gipahayag ni Deputy Governor ug AFASA Technical Working Group Adviser Elmore O. Capule ang pasalig sa BSP nga makigtambayayong sa CICC, NBI, ug SEC aron masiguro nga ang Anti-Financial Account Scamming Act (AFASA) ipatuman uban ang disiplina, integridad, ug pagsunod sa balaod.
Gilatid sa mga ISA ang mga proseso alang sa pagsiguro sa impormasyon gikan sa Consumer Account Protection Office sa BSP bahin sa mga pinansyal nga account nga nalambigit sa mga scam, subay sa AFASA ug sa mga lagda sa pagpatuman niini ubos sa BSP Circular 1214.
Kini nga mga kasabutan makatabang sa NBI ug CICC sa paghimo og mga kaso batok sa mga paglapas sa AFASA, ug magtugot sa SEC nga makakuha og impormasyon nga hinungdanon sa mandato sa regulasyon niini, lakip ang paghusay sa mga reklamo sa mga konsumidor sa pinansyal.
Sa kinatibuk-an, ang mga ISA nagpalig-on sa koordinasyon sa inter-agency batok sa mga scam sa pinansyal nga account, nagpalambo sa mga kapabilidad sa pag-imbestiga batok sa cyber-enabled fraud, ug nagpalig-on sa kolektibong paningkamot sa gobyerno sa pagpanalipod sa publiko batok sa krimen sa pinansyal.
