GENERAL SANTOS CITY- Nangalap pa og dugang impormasyon ang kapulisan sa San Isidro may kalabotan sa brutal nga pagpatay sa usa ka laborer human nga gigulgulan og liog og adunay samad tinigbasan.
Kahinumduman nga nakaplagan nga wala nay kinabuhi og nagkadugo nga nagbuy-od daplin sa dalan ang biktima nga si Sonny Boy Dawa, 21, taga Daremco Highway, Prk 22, Lagao.
Sa pakighinabi sa Bombo, gibutyag ni Raulita Roque, gibadlong niini ang biktima nga dili na mulaag apan wala siya gisunod og nagdala ug ilimnon ug milakaw kauban sa mga higala.
Pagkaabot og ala-una sayo sa buntag, giadtuan sila sa ilang balay ug gibalitaan nga nakaplagang patay si Sonny Boy sa Prk 2 Naval Conel Road San Isidro.
Matud kang P/C/Insp. Joel Martinez, hepe sa San Isidro PNP, blangko pa sila sa ilhanan sa mga suspek luyo nga sa inisyal nga imbestigasyon nasuta nga tulo ka tawo nga nakabonnet nga sakay sa duha ka motor ang mihawa sa crime scene.
Gitutukan nilang anggulo karon sa motibo sa krimen mao ang daghang reklamo batok sa biktima.
Daghan matud pa ang naglagot sa biktima tungod sa pagpamato niini sa mga motorista og kung mahubog gapamuak og botelya sa dalan.
Nakaangkon ug samad tinigbasan sa lawas og may dakong samad usab sa liog ang biktima nga halos mubulag na ang lawas sa ulo niini.
