GENERAL SANTOS CITY – All-set na ang Bombo Radyo GenSan alang sa matigayon nga Bombo Bancarera: Sarbay Fest 2018 edition.
Ipahigayon kini sa adlaw’ng Biyernes, Mayo 25, sa Gumasa, Glan, Sarangani Province, nga maoy sentro sa mga kalingawan sa Sarangani Bay Festival.
Gitawag kining labing bonggang edisyon gumikan gawas sa dagkong premyo nga P50,000 sa magkampeon; P30,000 sa first runner-up ug P20,000 ang sa second runner-up, ug tig-P2,000 nga consolation prize, dinhi usab magtagbo ang mga kampeon nga bancarerista gikan sa nagkalain-laing lugar sa nasud.
Kahibaluan nga mukabat sa 40 ka mga labing maayong banca riders nga mga pambato sa Soccsksargen, Cagayan de Oro, Iligan City, Surigao Del Sur, Cebu City, Mati Davao Oriental, Sta. Maria Davao City, Zamboanga Sibugay, ug uban pang lugar sa tibuok nasud.
Giimbitahan ang tanan, hilabi na kadtong mga makigduyog sa SarBay Fest 2018, ang labing dakong beach festival sa Mindanao, nga saksihan gayud ang maong programa sa Bombo, nga naandan na isip usa sa crowd-drawer matag tuig, gumikan siguradong mag-enjoy gayud sa kulbahinam nga lumba.
Gipasalig usab ni Sarangani Gov. Steve Chongbian Solon nga mamahimong hugot ang pagbantay sa seguridad atul sa Sarbay Fest, kung asa 600 ka mga kasundaluhan ug kapulisan ug uban pang ahensya, ang maoy magbantay sa seguridad aron mahimong luwas ug hapsay ang tibuok kasaulugan.
