Gipahibalo ni Bureau of Internal Revenue (BIR) Commissioner Charlito Martin R. Mendoza nga nag-andam ang ahensya og issuances aron tangtangon ang Value-Added Tax (VAT) sa gitugotan nga system loss charge nga apil sa bayranan sa kuryente.
Gihimo kini sa BIR subay sa direktiba ni Presidente Ferdinand R. Marcos Jr. aron mahatagan og dali nga ayuda sa ekonomiya ang mga konsumante.
Pormal nga ipagawas sa BIR ang Revenue Memorandum Circular (RMC) 15 ka adlaw human mapatik ang Energy Regulatory Commission (ERC) Resolution No. 26, Series of 2026. Kini nga resolusyon nagklasipikar sa system loss charges isip government-mandated pass-through cost.
Matod ni Mendoza, dili angay magbayad og VAT ang mga konsumante alang sa kuryenteng wala gyud makaabot sa ilang mga balay o negosyo. Ang pass-through charge mao ang gasto nga kolektahon gikan sa konsumante ug ipasa ngadto sa hustong makadawat niini. Busa, kung tangtangon ang VAT niini, mas moubos ang kantidad nga bayran sa mga konsumante sa kuryente.
Ubos sa ERC Resolution No. 26, Series of 2026, ang gitugotan nga system loss pagatagdon isip recovered cost ug dili taxable income alang sa mga generation company, National Grid Corporation of the Philippines (NGCP), ug mga distribution utility.
Gipasiugda ni Mendoza nga ang maong lakang nahiuyon sa giya ni Finance Secretary Frederick Go nga ipatuman ang mga reporma nga adunay direktang benepisyo sa publiko.
Ang umaabot nga direktiba nagpadayon usab sa RMC No. 60-2026 nga gipagawas niadtong Hunyo, diin gipahigawas gikan sa output VAT ug creditable withholding tax ang ubang government-mandated charges sama sa Lifeline Subsidy ug Green Energy Auction Allowance.
