GENERAL SANTOS CITY – Nahimo pang magmaneho ug motor padulong sa ospital sa usa ka lalaki human nga gidunggab sa Prk 7 Extension Brgy Apopong ning syudad.
Giila ang biktima nga si Ramon Detomas, 54, empleyado sa SOCOTECO 2, taga Litan Phase 2, Ext. Sinawal ning dakbayan.
Gikabutyag nga nakaangkon ug lima ka samad dinunggaban ang nasampit nga anaa sa tuo nga abaga, tulo sa dughan og uban pang bahin sa lawas.
Gikabutyag nga nag-inom ang biktima kauban ang suspek nga si Boy Buan sa maong lugar.
Naglalis ang duha sa wala matino nga rason nga nagresulta sa pagpanunggab sa suspek sa biktima gamit ang kutsilyo.
Gikabutyag nga una pa man mahutdan ug dugo ang biktima, nahimo pa niining magmaneho sa iyang motorsiklo padulong sa Mindanao Medical Center aron matambalan ang mga samad nga naangkon.
Kini human nga paspas nga mipalayo sa lugar ang suspek.
Pagkakaron padayon gimonitor sa kapulisan sa suspek aron kini maaresto og mapanubag sa salaod nga nabuhat.
