GENSAN- Gipasiugda ni BGen. Willie Dangane Sr., (Retired) ang dakong papel sa presensiya sa kapulisan sa lain-laing dapit aron mapugngan ang kriminalidad.
Matud niya, ang kanunay nga pagtan-aw sa mga pulis sa komunidad makahatag og kahadlok sa mga kriminal ug kasigurohan sa katawhan.
Sumala kang Dangane, angayan nga mas palapdan ang deployment sa kapulisan sa gawas sa mga estasyon, diin mga 80 porsyento sa mga sakop sa kapulisan ang ipagawas sa field samtang 20 porsyento lamang ang magpabilin sa opisina alang sa administrative nga mga buluhaton.
Kini, matud pa, aron mas mapaligon ang police presence sa mga barangay ug kalsada.
Gidugang usab niya nga dako og tabang batok sa kriminalidad ang klaro ug kanunay nga police visibility lakip na ang pagbutang og checkpoints ug police boxes sa mga estratehikong lugar.
Pinaagi niini, mas dali makita ang mga kadudahan nga lihok ug mas paspas matubag ang mga insidente.
Gipasiugda usab ni Dangane ang papel sa mga hepe sa kapulisan, nga angay nga aktibong makiglambigit sa mga katawhan sa komunidad.
Matud niya, ang mga residente mismo ang labing maayong tinubdan sa impormasyon bahin sa kahimtang ug mga panghitabo sa palibot, busa importante ang kusog nga relasyon tali sa pulis ug sibilyan.
