Magbalik na sa pagdula sa NBA ang kanhi Philadelphia 76ers forward ug three-time All-Star nga si Ben Simmons human kini opisyal nga mipirma og kontrata sa Sacramento Kings.
Nagkasabot ang duha ka partido sa usa ka tuig nga kontrata nga nagkantidad og $3.5 million alang sa umaabot nga season sa liga.
Sa wala pa ang iyang pagbalik, nagpa-kondisyon ug midula una ang 30-anyos nga magdudula sa Australia alang sa national basketball team sa iyang nasod, diin iyang gipakita pag-usab ang maayong kondisyon sa milabay nga offseason.
Tungod sa iyang gipakitang performance, nasulod sa radar sa pipila ka mga koponan sama sa Minnesota Timberwolves ug Golden State Warriors ang kanhi No. 1 overall pick. Apan ang Sacramento Kings lamang ang mipahimutang og pormal nga tanyag sa kontrata.
Nailhan si Simmons isip usa ka maayong two-way player nga adunay career averages nga 13.1 points, 7.4 rebounds, 7.2 assists ug 1.5 steals sa kinatibuk-ang 383 regular-season games nga iyang gidula alang sa 76ers, Brooklyn Nets ug LA Clippers.
Gilauman nga dako ang ikatampo sa iyang kasinatian ug depensa sa Kings alang sa ilang kampanya sa umaabot nga mga dula.
