GENERAL SANTOS CITY – Mukabat na sa kapin P12 Million ang kantidad sa nadaot nga pananum sa siyudad gumikan sa El Niño.
Sa pakighinabi sa Bombo Radyo GenSan kang Elsie Villanueva, assistant head sa City Agriculture Office-GenSan, gibutyag niini nga base sa ilang monitoring, miabot na sa 300 ka ektarya ang apektado sa hulaw.
Pinakagrabe matud pa ang kadaot nga natala sa Brgy. San Jose kung asa kinatibuk-ang 102 ka ektarya sa uma ang apektado nga sagad mga pananum nga saging.
Dugang pa ni Villanueva, mukabat sa 23 ektarya sa banana plantation ang gikonsiderang ‘totally damaged’.
Ang uban pang apektado mao ang barangay sa Upper Labay, Batomelong, Sinawal, Tinagacan ug Olympog.
Base usab sa validation sa City Agriculture GenSan, mukabat sa P3.7 million ang kantidad sa kadaot sa mais ug palay samtang P8.6 million sa high-value crops.
May natala usab nga kadaot sa cacao plantations sa Barangay Tinagacan ug Olympog.
