Gimando sa National People’s Coalition (NPC) nga tangtangon sa listahan sa ilang mga sakop si suspended Bamban, Tarlac Mayor Alice Guo tungod sa mga alegasyon nga nalambigit sa ilegal nga pag-operate sa Philippine offshore gaming operator (POGO) hub sa iyang lungsod.
Matud pa ni NPC chairman ug kanhi Senate President Vicente “Tito” Sotto III, kinsang mipagawas sa kamandoan human makadawat og petisyon gikan ni Tarlac Gov. Susan Yap niadtong Hunyo 17.
Nakalatid sa maong sulat nga dili makahatag ug lig-ong ebidensiya si Guo aron pagmatuod nga bakak ang mga pasangil batok kaniya.
Basi sa mga taho, ang Office of the Ombudsman nagmando sa pagsuspenso kay Guo human sa mga reklamo nga gisang-at sa Department of Interior and Local Government (DILG).
Dugang pa, gipasaka usab sa Philippine National Police – Criminal Investigation and Detection Group ug Presidential Anti-Organized Crime Commission ang kasong qualified human trafficking batok kang Guo tungod sa pasangil nga konektado siya sa labor trafficking sa dul-an 500 ka langyaw nga mga trabahante sa POGO.
