GENERAL SANTOS CITY – Gikinahanglan pa nga maberipika una mahibaw-an kung pila ang balido nga boto alang sa people’s initiative campaign.
Kini ang gipaklaro ni Atty. Sitti Sharmane Papandayan – Garangan, labaw sa comelec Gensan, luyo nga misobra ang natala nga boto sa dakbayan kon itandi sa gikinahanglang porsyento sa boto sa usa ka lungsod nga mamahimong mo-qualify alang sa people’s initiative sa plano nga pag-amyenda sa pipila ka bahin sa konstitusyon.
Samtang sa hisgutanan kung mahinayon ba ang pagpahigayon ug plebisito sa bulan sa Hunyo o Hulyo, wala pay mahatag nga komento ang buhatan gumikan wala pay nasayod sa dangatan sa kampanya sa pagkuha ug pirma.
Nasayran nga 48,841 nga pirma na ang natala sa buhatan kung asa misobra na sa 3% nga gikinahanglang pirma gikan sa mga rehistradong botante matag distrito.
