Aron makunhoran ang gasto, usa ka babaye migamit ug talagsaong paagi sa dihang mipalit siyag isda sa usa ka tindahan sa Guandong, China.
Nakita sa CCTV camera sulod sa tindahan ang babae nga nanakop ug buhing isda sa fish tank.
Hinuon, wala niya diretso nga gisulod sa tangke ang buhing isda nga iyang gikuha, hinuon gipahimutang kini sa yuta ug gitumban hangtod nga namatay.
Iyang gibalik ang patay nga isda sa tangke ug mikuhag laing isda ug gitumban kini pag-usab aron mamatay.
Matod sa staff sa supermarket, gibalhin sa babaye ang isda nga iyang napatay ug dayon nangayo og diskwento. Giingong niinsister ang babaye nga katunga lang sa presyo ang iyang bayran kay rason nga wa na silay kinabuhi dihang nakuha kini.
Apan usa sa mga staff ang niatubang sa babae nga giingong nangilad sa label sa presyo sa produkto nga iyang napalit kausa sa wala pa ang insidente.
Ang kahera nagdumili paghatag og diskwento sa isda, mao nga napugos ang babae sa pagbiya ug wala’y nahimo sa iyang aksyon.
Tungod sa pagduda sa babae, gisusi sa mga staff sa tindahan ang ilang CCTV camera ug nakita ang iyang gibuhat sa isda.
Gisapubliko sa tag-iya sa tindahan ang video aron pahimangnoan ang ubang mga tindahan bahin sa kinaiya sa babae.
Gipasabot usab niya nga mas taas ang presyo sa buhing isda tungod kay mas mahal ang pagdala niini ug pagmentinar sa mga tangke sa isda aron magpabiling buhi ug presko ang mga isda.
