Gitudlo si Atty. Jeremy Lotoc isip bag-ong Regional Director sa National Bureau of Investigation o NBI Region 8.
Gikumpirma ni Tacloban City Mayor Alfred Romualdez ang pagkadestino ni Lotoc human sa ilang pagpakigtagbo ug pagdawat sa bag-ong opisyal sa ahensya.
Sa wala pa ang iyang pagkadestino sa Eastern Visayas, nagsilbi si Lotoc isip Regional Director sa NBI-Bangsamoro Autonomous Region in Muslim Mindanao o BARMM ug nahimo usab siyang hepe sa NBI Cybercrime Division.
Nahimong kabahin usab siya sa nasudnong isyu human mitestigo isip ikaduhang testigo sa prosekusyon atol sa impeachment trial ni Vice President Sara Duterte niadtong Hulyo 2026.
Kapin 12 ka tuig nang nagserbisyo si Lotoc sa NBI ug nakahupot og nagkalain-laing posisyon sa pagpangulo sa ahensya.
Sa wala pa siya nahimong abogado, nagtrabaho siya isip OFW, mitabang sa negosyo sa ilang pamilya ug nagsilbi usab isip pastor, una siya nakapasar sa Philippine Bar Examinations niadtong 2012 ug naapil sa roll of attorneys niadtong 2013.
Isip hepe sa NBI Cybercrime Division, gipangulohan niya ang mga imbestigasyon sa cybercrime offenses ubos sa Republic Act 10175 ug uban pang high-profile nga kaso nga may kalabotan sa information and communications technology.
Sa wala pa ang iyang bag-ong posisyon sa Region 8, nagsilbi usab siya isip Regional Director sa MIMAROPA ug BARMM.
